حسبوك عورة

صباح السكينة.. ونوارس لمدينة..

صباح رزقنا لي مخبع فالسفينة..

جمعوه من المقاصرة

هدية لأجمل مينا..

سلطان راكب البحر

فاتحين ليه الطريق جاي لينا.. 

صادق يابو كريم

فلي ما يرضيك ولايرضينا...

واقع ما يحجبو غربال

يا با العمراني..الله يلطف بينا..

خرجت خاويه.. دخلات عامره

العرايش يا مسكينة..

حسبوك عورة..ومشاتلك العوينة

****

صباح فم السبع

وشواقو الحنينة..

واخا شحال من حبيب وصديق

داه لينا..

صباح الدعوة الصادقة..ربي يرحمنا

وما يعصف بينا..

صباح دقان المعاني الدفينة

من حومة باب بحر

الله يحفظها لينا..

بناسها لي بتاريخهم..

شحال تغنينا..

*******

صباح حصن الفتح عنوان

لأقدم حضارة..وأعرق مدينة..

راه مزال يقول ويعاود

ويأكد..ويوصي فينا..

منهدموش..منخربوش حاجة

مابنينها بيدينا..

وخى رجع مبهدل..بعظمة تاريخو

عمرو ماحقد علينا..

راه مسامحنا اذا تعمقنا

فيامو الزاهية وقرينا..

وقلنا تراث مدينتي ميتقاسش 

ورجعنا ليه ضحكتو الزينه..

******

لي فهم شي حاجة يا لحباب..

وتمعن وتصنت لينا..

مدينتكم هذي توكلو على الله

وماتبخلوش عليها وعلينا..

بلا خطى ولا سبان..بحلاوة اللسان..

والكلمة الحنينه..

نهزو كفوفنا للإله

يسمح لينا..

وترجع تفاحتنا زهرة زاهرة..

كيف ما تمنيتو وتمنينا..

**أبو يحيى**